Van toeka tot nou… Deel 1

Kom ons begin by die begin maar…ek het uit my Ma se maag gepop die 3de Maart 1977 in die Louis Leipold Hospitaal in Belville…was ‘n pokkeltjie van ‘n baba. My Broer is 3 jaar ouer as ek en het gelief om my te verpes – lekker ondeund…

    

Ja nee kyk, die foto waar ek so mooitjies staan en my bikini wil laat waai is omdat ek met my kinder-brein vas geglo het dat die klere is mos nou nat so dit moet AF! Hie-Hie! Needless to say ons het menigte kere rondgehol kaalgat in ons erf daarso in Brackenfell so onderdeur die sproeier in die warm Kaapse son…toe kinders nog kon kinders wees…was darem maar heerlik!

Van Brackenfell het ons getrek na Kuilsrivier in ‘n groter huis in met een helse groot erf – my Pa en Ma was albei baie lief

vir tuinmaak so ons het darem maar ‘n spogtuin gehad…ek soek nog die foto’s, weet nie of ek het nie…ai! Ek en my boetie was baie na-aan mekaar al het ons soms lekker vasgesit – broeder en suster liefde! Ha-ha!

 

Maar ons was maar meestal soet – my Ma het die pak uitgedeel en o boeta was ons maar lekker bang vir daai belt! Na die tyd by Pa gaat huil!  Nie dat Pa veel simpatie gehad het nie – ons was immers stout! Darem nie soos vandag se dae nie – dit was daai soet-stout kindermoles! Boeta jaag vir sussa om die huis, Boeta steek so per ongeluk die pophuis aan die brand laat die arme brandweer moet kom blus na buurman oor die heining spring en try help maar daai satansvuur kan g’n mens blus met ‘n hosepipe nie….ons het darem die sage oorleef en is na Ma se pakslae vandag nog hier om die storie te vertel…

To be continued…